نصائح و وصفات من برنامج اللقاء المفتوح

Vendredi 16 novembre 5 16 /11 /Nov 19:19

وصفات الجمال من عند الاخت فاطمة من طنجة 
وصفة لتنقية و تصفية البشرة الدهنية
المكونات
ملعقة كبيرة غاسول عادي
ملعقة كبيرة صابون بلدي
ملعقة عصير الحامض

الطريقة
نخلطو العناصر مزيان و نديرو الخليط على الوجه و نخليوه مدة 15 دقيقة ثم يغسل بماء دافي مخلط مع قطرات ماء ورد ثم نشللوه بالماء البارد
تستعمل الوصفة 3 مرات في الاسبوع



وصفة لإزالة حب الشباب و البتور
المكونات
ملعقة كبيرة غاسول ٲبيض
2 معالق كبار ماء ورد

الطريقة
نخلطو العناصر باش نحصلو على خليط خفيف شوية (بحال كريما خفيفة) ثم نديروه على الوجه و نخليوه مدة 20 دقيقة ثم يغسل
تستعمل الوصفة يوميا و هي تزيل حب الشباب و حتى الاثار ديالو


وصفة ضد تساقط الشعر
المكونات
قبطة ديال الزعتر طري او يابس
1 لتر ماء
الطريقة
نديرو الزعتر يغلي مزيان مع الماء حتى يتبخر الماء و يبقى النصف ديالو (يعني نصف لتر)ثم نبداو ندلكو بيه الشعر يوميا و ماشي ضروري نغسلوه و مع الاستمرار كيوقف التساقط
نغسلو الشعر ديالنا عادي كيف موالفين مرة او 2 مرات في الاسبوع 
بالنسبة اللي عندهم الشعر جاف باش ماينشفش اكثر مع الزعتر من بعد ما يديرو الوصفة يدهنو الشعر ديالهم بقطرات من زيت الخروع
و ضروري مرة مرة نعرضو الشعر للشمس لتغذيته و كذلك نمشطوه في اتجاهات مختلفة خصوصا بالنسبة للمحتجبات

 

وصفة لتقوية الاظافر
نحكو الثومة على الاظافر و نخليوهم مدة و من بعد نحكو عليهم التخت (التفل) ديال القهوة باش تزول رائحة الثومة و نغسلوهم
هاد الوصفة كتطول الاظافر و ما كتخليهمش يتكسرو


وصفة لترطيب اليدين 
المكونات
ملعقة صغيرة زيت الجليسيرين
2 معالق صغار حليب اللوز (يباع عند بائع الماكياج)
4 معالق صغار زيت الورد
4 معالق صغار شمع عادي دايب (ندوبوه عاد نعبروه)
الطريقة
نخلطو جميع العناصر و نديروهم فوق حمام مريم و منين يدوب الخليط و تنسجم العناصر نزولو الخليط من فوق النار و نخليوه يدفى شوية ثم نديروه في علبة نظيفة و نحتفظ به
يوميا كل ليلة قبل النوم ندهنو يدينا و حتى المرافق بشوية من الخليط و نخليوه حتى الصباح عاد نغسلو اليدين
وصفة لإزالة قشرة الشعر
نخلطو خل التفاح مع الثومة مدقوقة و نشققو بيهم الشعر مزيان خصلة بخصلة و نخليوه مدة 20 دقيقة ثم يغسل الشعر
تستعمل الوصفة مرة في الاسبوع قبل الحمام
بالنسبة لرائحة الثومة باش ما تبقاش فالشعر نديرو قهوة سريعة الذوبان مخلطة مع اصفر بيضة و نشللو الشعر بماء الزعتر او ازير او الخزامى او الريحان
وصفة لازالة الماكياج
المكونات
2 معالق صغار زيت اللوز
ملعقة صغيرة زيت الخروع
ملعقة صغيرة ماء البابونج
الطريقة
نخلطو جميع العناصر و نديروهم في قرعة و قبل الاستعمال نحركو القرعة مزيان ثم نمسحو الوجه كل ليلة بشوية من الخليط 
يمكن الاحتفاظ بالخليط في الثلاجة حتى لاسبوع
وصفة لترطيب البشرة
نخلطو ماء الخيار مع ملعقة صغيرة من الحليب سائل و ندهنو البشرة بالخليط يوميا

وصفة لتنظيف البشرة و إزالة البقع السوداء
ملعقة صغيرة دقيق الشعير
ٲبيض بيضة (للبشرة الدهنية)
ٲو اصفر بيضة ( للبشرة الجافة)
نخلطو دقيق الشعير مع ٲبيض ٲو ٲصفر بيضة حسب نوع البشرة و نديرو الخليط على الوجه و نخليوه مدة 15 دقيقة ثم يغسل بماء دافي
تستعمل الوصفة مرة في الاسبوع


و كنصيحة بالنسبة لٲي ماسك من الٲحسن نديروه في المساء حتى لا نتعرض لٲشعة الشمس

وصفة لتقوية الأظافر من عند فاطمة من مراكش

*ملعقة عسل
ملعقة زيت الأفوكا
وأصفر بيضة
كنخلطو جميع العناصر ونوضعوهم على الأظافر لمدة 10 دقائق يوميا.. نقدرو نحتفظو بالخليط فالثلاجة لمدة 3 أيام.
*زيت الزيتون تكون دافئة مع نقيطات ديال الخل- أي خل-
كندهنو بالخليط الأظافر.
*أصفر البيض
ملح
شوية العسل
كنخلطو العناصر ونوضعوهم على الأظافر لمدة 10دقائق ومن بعد كنغسلو يدينا كالعادة

وصفة للعناية باليد
*ملعقة سكر 
قطرات من عصير الحامض
ملعقة زيت الزيتون 
كنخلطو جميع العناصر مزيان وندهنو اليدين على شكل ماساج 2 مرات فالأسبوع 
*لتقشير اليد والحفاظ على جمالها
ملعقة الملح 
ملعقة زيت اللوز
كنخلطو العناصر وندهنو اليدين وحنا كندلكو بالشوية لمدة 10 دقائق 2 مرات فالاسبوع 
*لتبييض اليد
2 معالق صغار خميرة المعجونة
2 معالق من عصير الحامض 
2 معالق ماء
كنخلطو العناصر وندهنو اليدين وحنا كندلكو بالشوية ونخليوها لمدة 15 دقيقة 


 

 

 

Par mon ptit monde de saveurs beauté et santé - Publié dans : نصائح و وصفات من برنامج اللقاء المفتوح
Ecrire un commentaire - Voir les 1 commentaires
Vendredi 16 novembre 5 16 /11 /Nov 17:48

 بركوكس من عند السيدة فاطمة من حد براشوة
المقادير
نصف كيلو سميدة غليضة
1 لتر حليب
شوية حلبة
شوية حب رشاد
بصلة عادية او خضارية
ملح
شوية ابزار
زيت بلدية ٲو زبدة

الطريقة
نديرو السميدة في قصعة و نبداو نفتلو فيها بالدقيق و الماء و الملح بحال طريقة الكسكسو حتى تولي الحبات ديالها غليضة حتى تقرب تولي قد المحمصة
نديرو تقريبا 2 لترماء في برمة مع الحلبة و حب رشاد و البصلة و الملح و البزار و نخليوها تغلي و نديرو السميدة اللي فتلنا فالسكاس و نخليوها تفور مرة واحدة و لكن نخليوها يطلع فيها الفوار مزيان ثم نزولوها من الكسكاس و نحلوها بالزيت ٲو زبدة و نخليوها تبرد ثم نقصو البوطة على البرمة و نديرو فيها السميدة و نبقاو نحركو بحال المحمصة و ايلا خاص الماء نزيدو الماء طايب و نبقاو نحركو ثم نزيدو
 الحليب و نخليوه شوية خاصها تبقى شوية جارية
و يقدم ايضا مصحوبا بالعسل او املو 
berkouks_doumlou.jpg

 

Par mon ptit monde de saveurs beauté et santé - Publié dans : نصائح و وصفات من برنامج اللقاء المفتوح
Voir les 0 commentaires
Vendredi 9 novembre 5 09 /11 /Nov 22:31

 

  homework.jpg

 

 

نصائح السيدة حميدة من تطوان 

  نصيحة لتنظيف الدان 

 
*لتنظيف الٲلبسة ديال الدان (اي لون) ناخدو ممحاة (ڭومة) نحكو بيها البقع حتى تزول ثم ناخدو شيتة خاصة بالثوب ديال المليفة و الدان 
( كتباع عند المحلات الخاصة) و ندوزوها عليهم كتزول الخملة كاملة منهم

نصيحة للحفاظ على ليبوط 


*باش نحافظو على ليبوط (les bottes) و ببقاو مزيانين و شادين الفورمة ديالهم منين نبغيو نخزنوهم ناخدو قرعة طويلة و نغطيوها بليبة او تقشيرة و نديروها فيهم الراس ديال القرعة يكون التحت و نعمرو الفم ديالهم بالتقاشر القدام او قطع ورق 

لازالة طبعة الشمع من الملابس  


لإزالة الطبايع ديال الشمع من الملابس ناخدو موس ماضي مزيان و نزولو البقع ديال الشمع ثم نديرو كاغيطخفيف واحد تحت البقعة و واحد الفوق و نديرو عليهم المصلوح سخون و نحددو

 

لصوت الأبواب و النوافذ 

*البيزاڭرات ديال البيبان و الشراجم منين كيتصداو و يوليو يديرو صوت مزعج كناخدو قطعة ثوب و نفزڭوها مزيان بالخل و نمسحوهم باش يزول الصدٲ و الاوساخ ثم ناخدو قطعة ثوب اخرى من الاحسن
ديال القطن و نفزڭوها بالزيت الخاص بمكينة الخياطة و نمسحوهم كيبقاو مدة طويلة في حالة جيدة

 للتخلص من التونيا  و الحفاظ على ملابس الصوف 

*للتخلص من التونيا اللي كتكون فالحوايج ديال الصوف نديرو ٲكياس ديال الموسلين على حسب الطبقات اللي عندنا فالماريو و نديرو فيهم قشور الحامض ميبسين و الزعتر و مرد الدوش و الخزامى و نديرو كل خنيشة ديال الاعشاب فطبقة ٲو نعلقوها قرب الجلالب ديال الصوف ٲو المليفة اللي كيكونو معلقين. هاد الطريقة كتطرد التونيا و البرودة و كتعطي رائحة زوينة 
*الملابس ديال الصوف خصوصا التريكوات منين كنعرقو فيهم كتولي فيهم رائحة كريهة باش تزول الرائحة كنرقدوهم في الماء مع شوية الخل مدة ساعة ٲو ساعتين ثم نصبنوهم بالصابون الخاص بالصوف كتزول منهم الرائحة تماما و ما كيشبروش رائحة العرق بسهولة منين نلبسوهم

 

3 طرق لتنظيف النحاس الٲصفر كل وحدة تشوف الطريقة اللي تناسبها


الطريقة1
نخلطو شوية الخل مع الملح رطبة و نمسحو بيهم النحاس
الطريقة2
نخلطو شوية ديال التراب رطب مع بصلة محكوكة (الماء و اللب ديالها) حتى نحصل على عجينة لينة و نحكو بيها الاواني ديال النحاس
الطريقة3
نقسمو بصلة على جوج و نغمسوها في الملح رطبة و نحكو بيها النحاس

و طبعا منين نبغيو نحكو النحاس نلبسو القفازات باش ما يكحالوش يدينا

نصيحة للحفاظ على شوكات و سكاكين الفضة 


*باش يبقاو السكاكين و الملاعق و الفورشيطات ديال الفضة كيلمعو منين نبغيو نخزنوهم نديروهم في كيس ٲسود لعدم تسرب الهواء و الضوء و نديرو معاهم 2 ٲصابع ديال الطباشير (ٲو حسب الكمية اللي عندنا)كيبقاو كيلمعو و الطباشير كيشرب الرطوبة و منين نبغيو نستعملوهم نمسحوهم ٲو نشللوهم 

نصيحة للحفاظ على الورود 

*منين كتذبال الباقة ديال الورد باش نرجعو الحيوية للٲزهار و الورود كناخدو بانيو و نديرو فيه ماء سخون (ماشي دافي و ماشي غليان) و نحطو فيه السيقان ديال الورود يكون الماء طالع على السيقان ب 10 سنتيم و نخليوهم حتى يدفى الماء ثم نعمرو عليه الماء البارد و نقطعو شوية من السيقان ديال الورد من التحت و نخليوهم في الماء حتى يشربو شوية ثم نردوهم للمزهرية و نديرو ليهم الماء عادي هاد الطريقة كتعطيهم الإنتعاش

 

Par mon ptit monde de saveurs beauté et santé - Publié dans : نصائح و وصفات من برنامج اللقاء المفتوح
Ecrire un commentaire - Voir les 0 commentaires

Présentation

Image Hosted by ImageShack.us

 

Image Hosted by ImageShack.us

Créer un Blog

Recherche

Calendrier

Avril 2014
L M M J V S D
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        
<< < > >>

Partager

Créer un blog gratuit sur over-blog.com - Contact - C.G.U. - Rémunération en droits d'auteur - Signaler un abus - Articles les plus commentés